Bjørnafjorden brann og redning har hatt øving i den tidlegare barnehagen på Nore Neset dei siste måndagane.

I går kom det godt med røyk frå bygningane, men det var ingen brann.

– Dei fleste som ferdast i området ser ut til å vera vante med at vi øver, men det var nokre ungar som ringte 110 den eine måndagen. Det er bra at folk varslar når dei trur det er brann, seier Arne Rødberg frå Bjørnafjorden brann og redning.

Det er spesielt røykdykkarane i brannkorpset som har vore i sving.

– Vi har skifta på kven som har deltatt, men alle har vore på øving fleire gongar. Dette har vore veldig verdifull øving for oss.

– Eg trur denne veka var den siste med røykdykkarøving, men vi skal ut igjen. Då skal vi øva på sløkking av brann i tak.

Det kan med andre ord bli endå meir synleg aktivitet i barnehagebygget på eigedomen som kommunen skal selja.