I morgon, tysdag 24. februar, er det fire år sidan Russland sin store invasjon av Ukraina.

FN-observatørar melder at 2025 var det mest dødelege året for sivile sidan storkrigen starta.

Også i år vil Den Ukrainske Forening i Bjørnafjorden arrangera ei solidaritetsmarkering til støtte for Ukraina sine soldatar og det ukrainske folket.

– Under arrangementet går det føre seg innsamling til akutte behov for befolkninga i Ukraina, skriv Pavlo Nevidnychyy, leiar i foreininga, i invitasjonen.

Markeringa startar i Os kyrkje på ettermiddagen. Så er det fakkeltog til Vognhallen.

Der skal blant andre ordførar Terje Søviknes, hundetrenar Rune Fjellanger og leiar for Bjørnafjorden Næringsråd, Kristian Bruarøy, halda tale.

Dei fire siste åra har minst 15.000 sivile mista livet. Endå fleire soldatar, på begge sider, har falt i strid, i ei oppsummering i dag.

Den siste forhandlingsrunden mellom Russland og Ukraina blei avslutta 18. februar i år. Den gjekk føre seg i Genève, med USA som meklar.

Det vanskelegaste spørsmålet i forhandlingane er framleis kven som skal ha eigarskap over landområde aust og sør i Ukraina.