Mange i Noreg og Bjørnafjorden opplever det unødvendig tungvint å byggje, utvikle og skape noko – sjølv på eigen eigedom. Anten det gjeld ein garasje, bustad, næringsbygg eller tomtedeling, blir ein møtt med eit komplisert regelverk, lange ventetider og mykje byråkrati.

Det skaper frustrasjon – og det bremser utviklinga både for innbyggjarar og næringsliv.

Under dagens regjering har det dessverre blitt endå meir tungrodd.

Saksbehandlingstida har auka, detaljstyringa frå staten er meir omfattande og kommunane har fått mindre fridom. Det burde vore motsett.

Eit effektivt og føreseieleg plansystem er avgjerande for lokal vekst. Det er gjennom god planlegging at vi legg til rette for nye bustader, arbeidsplassar og framtidsretta samfunnsutvikling.

Høgre har, sidan vi kom i førarsetet i kommunen, jobba målretta for å få fart på utviklinga.

Resultata er tydelege: Vi har fått godkjent over 10 store reguleringsplanar dei siste 2 åra. Desse planane bidreg direkte til bustadbygging, næringsutvikling og betre lokalsamfunn.

Samstundes har eg fleire gongar som kommunestyremedlem vore vitne til korleis delar av opposisjonen har forsøkt å utsetje eller stanse desse planane.

Høgre har likevel klart å sikre fleirtal – fordi vi prioriterer framdrift og utvikling i kommunen vår.

Eit konkret hinder vi har møtt førre kommunestyreperiode, var mangelen på ein oppdatert arealplan for Bjørnafjorden vest. Det skapte forseinkingar i fleire saker.

Men i 2023 tok vi grep: Høgre var med og sikra fleirtal for ny arealplan for Bjørnafjorden vest. Den var nok ikkje perfekt, men viktig.

Den planen har allereie gjort det enklare å få viktige utviklingsprosjekt gjennom.

No er neste steg i gang – arbeidet med ein oppdatert arealplan for heile kommunen. Denne planen blir heilt avgjerande for å posisjonere Bjørnafjorden for framtida. Med ein moderne og heilskapleg plan får vi betre oversikt, større handlefridom og betre rammer for både bustadbygging, næring og miljøomsyn.

På nasjonalt plan har Høgre allereie vist at vi leverer.

Då vi styrte regjeringa, forenkla vi plan- og bygningslova, fjerna unødvendige søknadskrav, innførte klare tidsfristar og moderniserte tekniske forskrifter.

Eit heilt konkret døme er: Søknadsfrihet for mindre byggverk, f.eks. garasjer under 50 m²

I programmet vårt for 2025–2029 vil vi gå endå lengre: forenkle regelverket ytterlegare, redusere statlege innsigelsar og ta i bruk ny teknologi for å sikre raskare og meir føreseieleg sakshandsaming.

For oss i kommunepolitikken betyr det alt å ha nasjonale rammer som fungerer. Difor er det ikkje berre viktig at Høgre styrer her lokalt – det er like viktig at vi får Høgre sin politikk inn att i regjering. Vi treng ein nasjonal politikk som spelar på lag med kommunane, og ynskjer utvikling og vekst.

Vi står framfor viktige val 8. september.

Eg vågar ikkje å overlate arealpolitikken til Arbeidarpartiet med støtte frå Raudt og MDG. Gjer du?

Stem Høgre – for enklare prosessar, fleire moglegheiter og eit Bjørnafjorden i vekst og utvikling.

Emil Brimsholm
Formannskapsmedlem
Nestgruppeleiar Bjørnafjorden høgre