Brimsholmen Bru- og Veglag AS, som ikkje fekk kommunal støtte til ny bru, skaffa finansiering sjølv.

No har ny flytebru frå Valen Marina, produsert av Etne Betong, kome på plass.

Søndag blir den montert.

– Då må vi lata bilen stå, men det går greit, for mange av oss skal likevel jobba dugnad. Vi finansierer den sjølv og vi monterer den sjølv, seier Erik Vigander frå Brimsholmen Bru- og Veglag AS.

Han har fått eit godt førsteinntrykk av ny bru, der den ligg inntil den gamle.

– Den er omtrent 40 cm høgare. Det vil gi meir mjuk køyring på og av rampen.

• Dagens bru er frå 1991. Den er 4,2 meter brei. Bereevna er redusert frå opprinnelege 6 tonn til 4 tonn
• Ny bru har bereevne på 20 tonn og har ei breidde på 6 meter.

– No har brannvesenet sjanse å koma seg over, om det blir oppdrag på øya, og det blir langt tryggare for fotgjengarar.

Utriggarane blei fjerna tidlegare denne veka, men skal på plass igjen.

Den gamle brua er selt, men ikkje langt. Den blir utvida brygge på Bunnpris Vedholmen Landhandel.