Laurdag 10. januar frå klokka 09.30 til 15.00 skal brannvesenet gjennomføre ei øving i Ulven leir. På tampen av øvinga skal det gjennomførast ei kontrollert nedbrenning av bygget.

Midtsiden er i leiren under øvinga. Vi kjem med med meir om bygg, øving og nedbrenning når øvinga er over.

Det er ei tidlegare kaserne, no kalla SIBO-bygget (brukt til øving på «strid i bebygd område»), som Forsvaret no ønskjer å riva.

Bygget er stort – om lag fire gongar så stort som ein vanleg einebustad. Det er venta at øvinga vil føre til ein del røyk og synlege flammar i området.

– Det er stille og kaldt vêr, så varmen vil truleg stige rett opp, men det vil likevel vere ein del røyk, seier varabrannsjef Erik Walden.

Brannvesenet understrekar at dette er ei planlagd øving, og at det ikkje er grunn til å ringe nødnummer dersom du ser røyk eller flammar frå Ulven leir i dette tidsrommet.

Øvinga kjem berre få dagar etter ei alvorleg brannulykke i Verdal, to røykdykkarar omkom under sløkkearbeid natt til onsdag 7. januar.

– Ulykka er ei kraftig påminning for oss. Vi må vere ekstra merksame på faremoment og sørgje for at vi har rett utstyr og gode rutinar, seier Walden.

Brannvesenet ber om forståing for eventuelle ulemper øvinga kan medføre, og minner om at øving er ein viktig del av arbeidet med å vere best mogleg rusta til reelle hendingar.

Dette er ikkje første gong brannvesenet får bruka nedbrenning i Ulven leir som øvingsobjekt.

På ein annan iskald dag, i desember 2007, var det øving og nedbrenning av Sjukestova.

Sjukestova i Ulven leir i desember 2007. Foto: Kjetil Vasby Bruarøy / Midtsiden

1/13

Bygget hadde stått ubrukt og utan oppvarming ei stund.

Varabrannsjef Arne Monsen smilte nøgd då han fekk fyr på ei madrass dynka i drivstoff, og dette smitta over på dei frosta husveggane – men det gjekk ikkje mange minutt før Midtsiden sin fotograf og brannmannskapen måtte koma seg ut.