Torsdag 16. oktober var «Den internasjonale hjarte- og lungeredningsdagen».

Os Røde Kors og Fusa Røde Kors markerte dagen ved å oppmoda alle som eig ein hjartestartar om å sjekka kartet i Hjertestarterregisteret og sjå om dei finn hjartestartaren sin.

– Om ikkje, logg deg på og oppdater informasjonen, seier Kristian Strønen frå Os Røde Kors.

Når kvart sekund tel

Ved hjartestans er det avgjerande å starta med hjarte-og lungeredning så raskt som mogleg.

Men det åleine er som regel ikkje nok til å få hjartet til å slå igjen.

For å få tilbake normal hjarterytme trengst ein hjartestartar.

– Statistikken viser at dess raskare det skjer – dess større er sjansen for å få liv i pasienten igjen.

På nett og app

Oversikta over kvar hjartestartarar er, finn du i Hjertestarterregisteret, hjertestarterregister.113.no og i appen «Hjelp 113», som du gratis kan lasta ned på telefonen din.

Det er også dette registeret AMK-sentralane bruker når du tar kontakt på nødtelefonen 113.

Røde Kors tilbyr å hjelpa eigarane med registreringa.

Må oppdaterast kvar sjette månad

For at hjartestartaren skal kunna visast på kartet over aktive hjartestartarar må eigaren ha registrert han – og ha oppdatert registreringa – kvar sjette månad.

Viss ikkje dette blir gjort så blir den sett på som inaktiv.

Ein inaktiv hjartestartar er ein som har vore registrert i Hjertestarterregisteret, men der eigaren ikkje har oppdatert informasjonen.

Den blir då ikkje vist lenger på kartet over tilgjengelege hjartestartarar – verken i appen eller på nettsida.

– Os Røde Kors og Fusa Røde Kors kan administrera hjartestartaren for deg – vederlagsfritt.

No administrerer Os Røde Kors 16 hjartestartarar for offenlige institusjonar, bedrifter, lag og organisasjonar.

– Vi tar gjerne ansvaret for din òg, om han er ein av dei som er tilgjengeleg døgnet rundt.

Har kursa 260 innbyggarar så langt i år

Strønen oppmodar òg innbyggarane om å læra seg både hjarte- og lungeredning og bruk av hjartestartar.

– Vi arrangerer kurs for bedrifter, skular, velforeiningar, lag og organisasjonar gjennom heile året. Inntektene frå desse kursa hjelper oss å driva beredskap året rund.

Så langt i år har lokalt Røde Kors lært opp over 260 personar til å bruka ein hjartestartar.