Dei siste vekene har det vore fleire tilfelle av hærverk i bygda, både i Os sentrum, på Kuventræ og på Lunde.

Sølvi Walle, som bur i den staselege villaen med den store hagen midt på Osøyro, fortviler etter fleire tilfelle av ruteknusing.

Delar av gjerdet ho har mellom hage og Postvegen har vindauge. No manglar fleire.

– Det første blei knust for knappe to veker sidan. Det såg ut som eit kulehol. Eg ringte politiet og sendte bilde, men eg lurte på å ikkje melda det. Eg reknar med at det blir henlagt uansett.

– Men det er kostnadar med dette, i tillegg blir det mykje styr med å få det fiksa.

I staden ringte ho ein av sønene, Rune, så han kunne setja inn nytt glas.

– Først brukte eg ein heil laurdag på å rydda glasskor og laga nye profilar til nytt glas. Når eg kjem her i dag for å setja ny rute inn, så er yttarlegare tre ruter knuste.

No ber han om tips, han vil ha namnet på den som står bak.

– Eg tar det i første omgang ikkje vidare med politiet, det er begrensa kva dei kan gjera. Mi erfaring er at direkte dialog med gjerningspersonen fungerer langt betre.

– Eg har drive butikk i Os sentrum før. Det hendte at den var utsett for både tjuveri og hærverk. Dei gongane eg fekk veta kven som sto bak, løyste det seg greit etter ein prat.